Жаңалықтар

2025 жылғы 22 мамыр күні  Астана халықаралыық университеті Қазақстан Республикасы Ғылым және жоғары білім министрлігінің Тіл саясаты комитеті, Халықаралық «Қазақ тілі» қоғамы және ҚР Президенті жанындағы ҚР Ұлттық ғылым академиясымен біріге отырып, «Ғылымдағы тіл стратегиясы: мәселелер мен шешу жолдары» атты республикалық семинар-кеңес өткізді. Семинар- кеңестің мақсаты: Ғылыми кеңістікте мемлекеттік тілдің қолданыс аясын кеңейту. Семинарға жоғары оқу орындарының, ғылыми-зерттеу институттары мен орталықтарының мемлекеттік тілді дамытуға жауапты лауазымды тұлғалары, Жоғары және жоғары оқу орнынын кейінгі білім, Ғылым және жоғары білім саласындағы сапаны қамтамасыз ету комитеттерінің, Жоғары оқу орындары қауымдастығының өкілдері қатысып,  ғылыми мақалалардың, диссертациялық жұмыстардың, ғылыми және ғылыми-техникалық жобалардың және құжат айналымның мемлекеттік тілде жазылуын қамтасыз етуде әкімшілік ұйымдастырушылық процесті жетілдіру бойынша пікір алмасты.

Семинар-кеңестің ашылуы ҚР Ғылым және жоғары білім министрлігі Тіл саясаты комитетінің төрағасы, ф.ғ.к. Ербол Ердембекұлы Тілешовтың Кіріспе сөзімен басталып, Халықаралық «Қазақ тілі» қоғамының вице-президенті, ф.ғ.д., профессор, ҚР ҰҒА академигі Шерубай Құрманбайұлының «Ғылымдағы терминологияны жетілдіру мен бірізділендірудің өзекті мәселелелері» және Астана халықаралыық университетінің вице-президенті Қайрат Амангелдіұлы Абдрахмановтың «Білім беру үрдісі барысындағы құжат айналымдағы тіл заңнамасының сақталуы» және басқа да баяндамаларымен жалғасты. Семинар-кеңесте еліміздің ЖОО-дарында қазақ тілінде жарияланған ғылыми мақалалар, құжат айналымының қазақ тілінде қаншалықты деңгейде жүргізіліп жатқанына сараптама жасаған ҚР Ғылым және жоғары білім министрлігі Тіл саясаты комитеті Тіл заңнамасының сақталуын қамтамасыз ету басқармасының бас сарапшысы, ғылым докторы Берікхан Иісбекұлының «Ғылымдағы тілдік ахуал: жетістіктері мен мәселелері» тақырыбындағы баяндамасы қатысушылар назарын аударды.

ҚР Ғылым және жоғары білім министрлігіне қарасты Тіл саясаты комитеті басшыларының айтуы бойынша барлық ЖОО-лардың құжат айналымы және қазақ тіліне қатысты басқа да шаралар бұдан әрі қатаң қадағаланып, назарда болады. Қазақ тіліне деген бұл жаңа бетбұрыс игі нәтижесін береді деген ойдамыз.

2025 жылғы 22 мамырда Astana International University қабырғасында ҚР Ғылым және жоғары білім министрлігінің Тіл саясаты комитеті, Халықаралық «Қазақ тілі» қоғамы, ҚР Президенті жанындағы ҚР Ұлттық ғылым академиясы және университетіміздің бірлескен ұйымдастыруымен «Ғылымдағы тіл стратегиясы: мәселелер мен шешу жолдары» атты республикалық семинар-кеңес өтті.

🔹 Семинардың мақсаты – ғылыми кеңістікте мемлекеттік тілдің қолданыс аясын кеңейту, диссертациялық зерттеулер мен ғылыми жобаларда, сондай-ақ құжат айналымында қазақ тілінің үлесін арттыру.

📍 Іс-шара ҚР Президенті Қасым-Жомарт Тоқаевтың қатысуымен өткен «Әділетті Қазақстан – Адал азамат» Ұлттық құрылтайының екінші отырысындағы хаттамалық тапсырмалар аясында өтті.

🔷 Семинар-кеңес жұмысына еліміздің жетекші жоғары оқу орындары, ғылыми-зерттеу институттары мен орталықтарының мемлекеттік тілді дамытуға жауапты өкілдері, министрлік құрылымдары мен сарапшылар қатысты.

💬 Баяндамашылар мен олардың бағыттары:

· Ербол Ердембекұлы Тілешов, ҚР Ғылым және жоғары білім министрлігі Тіл саясаты комитетінің төрағасы, филология ғылымдарының кандидаты — семинарды ашып, мемлекеттік тіл саясаты мен ғылымдағы тілдің өзекті бағыттары туралы баяндама жасады.

· Шерубай Құрманбайұлы, филология ғылымдарының докторы, профессор, ҚР ҰҒА академигі, Халықаралық «Қазақ тілі» қоғамының вице-президенті — ғылымдағы терминологияны жетілдіру мен біріздендірудің мәселелері туралы сөз сөйледі.

· Жанар Амангелдіқызы Темірбекова, экономика ғылымдарының кандидаты, Қожа Ахмет Ясауи атындағы Халықаралық қазақ-түрік университетінің ректоры — “Қазақ тілі – ғылым тілі” симпозиумының тәжірибесі мен академиялық терминжасам мәселелері туралы баяндама жасады.

· Берікхан Иісбекұлы, ҚР ҒЖБМ Тіл саясаты комитетінің Тіл заңнамасының сақталуын қамтамасыз ету басқармасының бас сарапшысы, PhD — ғылымдағы тілдік ахуал: жетістіктері мен мәселелері тақырыбында баяндама жасады.

· Ардақ Бақытұлы Бейсенбай, филология ғылымдарының кандидаты, Л.Н. Гумилев атындағы Еуразия ұлттық университетінің Басқарма мүшесі – академиялық мәселелер жөніндегі проректоры — ЕҰУ тәжірибесі негізіндегі тіл стратегиясы туралы бөлісті.

· Ертарғын Тойғанұлы Шахман, география ғылымдарының кандидаты, Торайғыров университетінің жастар саясаты, әлеуметтік және шаруашылық мәселелері жөніндегі проректоры — университет тәжірибесіндегі тілдік стратегия туралы сөз сөйледі.

· Қайрат Амангелдіұлы Абдрахманов, Astana International University вице-президенті — білім беру үдерісіндегі құжат айналымда тіл заңнамасының сақталуы туралы баяндама жасады.

· Қуантар Дәуренұлы Әлиханов, ҚР Президенті жанындағы ҚР Ұлттық ғылым академиясы Пәнаралық ғылым орталығының директоры — ҰҒА-ның ғылымдағы тілдік саясатты жетілдірудегі рөлі туралы бөлісті.

🔊 Семинар қорытындысында ашық пікірталас (еркін микрофон) форматында қатысушылар тәжірибе алмасты. Қорытынды ұсыныстар мен бағыттар айқындалды.

📍  Астана Халықаралық университетінің базасында өткен семинар ғылым саласында қазақ тілінің рөлін кәсіби деңгейде талқылайтын маңызды алаңға айналды. Университет алдағы уақытта да білім мен ғылымдағы мемлекеттік тіл саясатын дамытуға белсене ат салыса бермек.

2025 жылғы 12 мамырда Astana International University президенті Серік Азтаевич Ирсалиев Ахмет Байтұрсынұлы атындағы «Taldau» Білім беру сапасын бағалау және зерттеу ұлттық орталығы» АҚ директорлар кеңесінің төрағасы болып сайланды.

«Taldau» — Қазақстан Республикасы Оқу-ағарту министрлігіне қарасты білім беру саласындағы жетекші ұлттық талдау және бағалау орталығы. Орталық мемлекеттік білім беру саясатын жан-жақты аналитикалық сүйемелдеумен, білім беру жүйесінің жай-күйі мен даму барысы туралы жыл сайынғы Ұлттық баяндамаларды әзірлеумен, сондай-ақ Қазақстанның халықаралық салыстырмалы зерттеулерге қатысуын үйлестірумен айналысады, атап айтқанда:
🔹 ЭЫДҰ бағытында — PISA, PIAAC, TALIS, PISA for Schools
🔹 IEA бағытында — TIMSS, PIRLS, ICILS

«Taldau» қызметінің негізгі бағыттарына сондай-ақ Ұлттық білім беру деректер базасын (ҰБДБ) сүйемелдеу және дамыту, халықаралық ұйымдармен бірлесіп елдік шолулар жүргізу, білім саласындағы ғылыми зерттеулер және білім беру ортасын цифрлық трансформациялау бойынша сараптамалық қолдау кіреді.

2011 жылы құрылған сәттен бастап, әсіресе 2014 жылы өкілеттіктері кеңейтілгеннен кейін, «Taldau» білім беру саласындағы стратегиялық шешімдер қабылдауға арналған дәлелді база қалыптастыруда маңызды рөл атқарып келеді. Орталық ғылыми ұйым ретінде аккредиттелген және ЭЫДҰ мен Дүниежүзілік банк секілді халықаралық құрылымдармен тығыз ынтымақтастық орнатқан.

Университетіміздің президенті Серік Азтаевич Ирсалиевтің бұл лауазымға тағайындалуы — оның кәсіби біліктілігі мен көшбасшылық тәжірибесіне көрсетілген жоғары сенімнің айқын дәлелі. Ол орталықтың негізін қалауға атсалысып, 2010 жылы оның институционализациялау процесіне белсенді қатысқан, ал 2013–2017 жылдары аралығында «Taldau» орталығын президент ретінде басқарған. Сол жылдары орталықтың аналитикалық және ұйымдастырушылық негіздері қаланды.

Astana International University ұжымы Президентімізді жаңа қызметімен шын жүректен құттықтайды және оның басшылығымен «Taldau» сапалы, ашық әрі нәтижеге бағытталған білім беруді дамытуға зор үлесін жалғастыра беретініне сенімді.

13.05.25 ж. Экономика жоғары мектебінде "ҚР СЖжРА Ұлттық статистика бюросының мысалында Мемлекеттік қызметке түсу ерекшеліктері" тақырыбында қонақ дәріс өтті.

Спикер ретінде Қазақстан Республикасы Стратегиялық жоспарлау және реформалар агенттігінің Ұлттық статистика бюросының адам ресурстарын дамыту департаментінің директоры Арсен Абзалұлы Жақыпов сөз сөйлеп, студенттерге Мемлекеттік қызметтің ерекшеліктері және мемлекеттік қызметшілердің лауазымдық өкілеттіктерін орындау жөніндегі қызметі туралы айтып берді. Астана қаласы Халық статистикасы департаментінің халық статистикасы және демографиялық таңдар басқармасының сарапшысы болып табылатын жас маман Амантай Арман Асқарұлы Мемлекеттік қызметке кіру кезеңдерінен өту тәжірибесімен бөлісті, студенттер сұрақтар қойып, жауап алды. Кездесу өте қызықты және танымды болды!

Қазақша нұсқасы:

👨‍⚖️ Темірлан Төлегенов, PhD, 24 жылдық тәжірибесі бар құқық саласының сарапшысы және авторлық құқық бойынша оқытушы келесі тақырыптарды нақты мысалдармен түсіндіріп береді:
⠀

• Авторлық құқық дегеніміз не және ол сабақтас құқықтардан қалай ерекшеленеді

• Неліктен авторлық құқық креативті индустрияның негізі болып табылады

• Меншік құқығы мен жеке мүліктік емес құқықтардың айырмашылығы неде

• Неліктен шығармашылық маман өз туындысын ақшалай табыс көзіне айналдыруға құқылы

• Авторлық немесе сабақтас құқықтарды тиімді қалай тіркеуге болады

• Шығармаға меншік құқығын пайдалануға беру қалай жүзеге асырылуы керек

• Автор немесе құқық иесі өз құқықтарын қанша уақытқа дейін ақшаға айналдыра алады

• Авторлық қоғам мен музыкалық баспаның айырмашылығы неде

• Қазақстанда авторлық құқық қалай қорғалады
  ⠀
  📅 Қашан: 24 мамыр, 11:30
  📍 Қайда: Астана, Мұхтар Әуезов көшесі, 46/1, Astana International University
  ⠀
  📩 Қатысқыңыз келе ме? Био сілтеме арқылы тіркеліңіз!  https://docs.google.com/forms/d/e/1FAIpQLSfNpf0GWDMY80yy0Ai0a1sxIZGPDHue7PL3RnqPbOqzFgIziQ/viewform?usp=dialog

2025 жылғы 16 мамырда Astana International University-де Педагогикалық институттың ұйымдастыруымен «Ұлттық құндылықтар негізіндегі білім беру жүйесі: саралау, жүйелеу, негіздеу» атты республикалық ғылыми семинар өтті. Бұл маңызды ғылыми шара көрнекті педагог, профессор Сейсекүл Айтжанқызы Көшімбетованың білім беру саласындағы 45 жылдық қажырлы еңбегіне арналды.

Семинарды университеттің Педагогикалық институтының директоры, педагогика ғылымдарының кандидаты, қауымдастырылған профессор Жанна Қуанышқызы Ахмадиева ашты. Қонақтарға арнап құттықтау сөз сөйлегендер қатарында ҚР Парламенті Сенатының депутаты Нұртөре Жүсіп, AIU вице-президенті, биология ғылымдарының докторы Анар Мырзагалиева, «Сенімен болашақ» республикалық ата-аналар қауымдастығының негізін қалаушы Асан Нұркенов, «Қара шаңырақ» ҚБ директоры, этнолог, ҚР Журналистер одағының мүшесі Тұрар Саттарқызы, Л.Н. Гумилев атындағы ЕҰУ профессоры, педагогика ғылымдарының докторы Абдимажит Саипов, сондай-ақ аталған университеттің Педагогика кафедрасының профессоры Қадиша Шалғынбаева және профессор, педагогика ғылымдарының докторы Заида Жұмабаева болды.

Семинар барысында ұлттық құндылықтарды білім беру жүйесіне енгізу, оқытушының тұлғалық рөлі мен тәрбиелік миссиясы, сондай-ақ Сейсекүл Айтжанқызының педагогикалық феномені мен мұрасына арналған мазмұнды баяндамалар тыңдалды. Ұстаздың шәкірттері де өз естеліктерімен бөлісіп, рухани сабақтастықты жалғастырды.

Іс-шараның шарықтау шегі ретінде Сейсекүл Көшімбетованың «Парасат жолы» атты кітабының тұсаукесері өтті. Бұл еңбек – автордың өмірлік тәжірибесі мен ұстаздық ұстанымдарын, парасат пен адамгершілікке негізделген педагогикалық философиясын паш ететін құнды туынды. Семинар соңында Сейсекүл Айтжанқызы қорытынды сөз сөйлеп, өмірлік және кәсіби жолында бірге болған әріптестеріне, шәкірттеріне және университет ұжымына алғысын білдірді.

Семинар қонақтары мен қатысушыларына арналған дәстүрлі мерекелік дастархан жылы лебіздер мен рухани ықыласқа толы форматта өтті. Шара аясында айтылған ойлар мен ұсыныстар қазіргі білім беру жүйесін ұлттық құндылықтармен сабақтастыра отырып жаңғыртуға серпін берді.

Astana International University ұжымы Сейсекүл Айтжанқызы Көшімбетоваға отандық педагогикаға сіңірген өлшеусіз еңбегі үшін алғыс білдіреді. Жоғары білім беру саласында бірнеше буын ұстаздарды тәрбиелеп, ғылыми ортада өз орнын қалыптастырған, Жамбыл облысына еңбегі сіңген құрметті профессор Сейсекүл Айтжанқызына Жамбыл облыстық ардагерлер кеңесінің төрағасы Еркінбек Солтыбаевтың атынан құрметпен Алғыс хат табысталды.

Сондай-ақ, семинарға қатысқан барша қонақтар мен баяндамашыларға ғылыми-әдістемелік пікір алмасуға қосқан үлестері үшін AIU ұжымы шынайы ризашылығын білдіреді. Мұндай кездесулер білім мен тәжірибе алмасудың тиімді алаңы бола отырып, болашақ педагогтарды даярлау ісінде маңызды рөл атқарады.

2025 жылдың 10 сәуірінде экономика жоғары мектебінде академиялық бағдарламалар жетекшілерімен, серіктес кәсіпорындармен және профессор-оқытушылар құрамымен бірлескен Академиялық кеңес отырысы өтті. Алдағы күндері ынтымақтастықтың келешегі туралы пікір алмасулар жалғасты.

Күн тәртібіне сәйкес, әрбір білім беру бағдарламасының жетекшісі Академиялық кеңес қатысушыларына өз бағдарламасын таныстырып, жұмыс берушілермен бірге бизнес пен мемлекеттік құрылымдардың кадрларға деген сұранысын, білікті мамандар даярлау мәселелерін, оқу бағдарламаларын нарық талаптарына бейімдеу жолдарын талқылады.

Академиялық кеңес жұмысының нәтижесінде жұмыс берушілер тарапынан пәндер мен олардың мазмұнына ұсыныстар берілді, модульдік оқу бағдарламалары мен элективті пәндер каталогтарына пікірлер мен сараптамалық рецензиялар алынды. Экономика жоғары мектебімен көп жылдан бері ынтымақтастық орнатып келе жатқан белсенді серіктестерге алғыс хаттар табысталды.

2025 жылғы 15 мамырда AIU-дың физика кафедрасының қауымдастырылған профессоры, PhD, физика-математика ғылымдарының кандидаты Нұркенов Серік Амангельдинұлы ҚР Ғылым және жоғары білім министрлігінің қолдауымен И. Алтынсарин атындағы Арқалық педагогикалық университеті ұйымдастырған «Физика және информатика пәндері бойынша олимпиаданы ұйымдастырудың заманауи тәсілдері» атты республикалық ғылыми-әдістемелік семинарға қатысты.

Семинар аясында Серік Амангельдинұлы «Физика пәнінен студенттерді олимпиадаларға дайындаудың тиімді тәсілдері» тақырыбында баяндама жасап, дарынды оқушылардың зияткерлік әлеуетін дамытуға бағытталған озық әдістемелермен, халықаралық білім беру бағдарламаларындағы және ұлттық жобалардағы тәжірибесімен бөлісті.

Аталған семинар – зияткерлік жарыстарды ұйымдастырудың заманауи әдістерін, білім беру үдерісіне цифрлық технологияларды енгізуді және оқушылар мен студенттердің ғылымға қызығушылығын арттыру жолдарын талқылауға арналған тиімді алаң болды.

AIU университеті еліміздің ғылымы мен біліміне үлес қосып жүрген ұстаздарымен мақтанады.

2025 жылғы 15 мамырда Astana International University-де QS компаниясының Шығыс Еуропа және Орталық Азия елдері бойынша аймақтық директоры Сергей Христолюбовпен жұмыс кездесуі өтті. Кездесуге университеттің президенті, вице-президенті және жоғары мектептердің декандары қатысты.

Диалог барысында QS рейтингтерінің әдіснамасы, аналитикаға көзқарастар, жарияланым белсенділігі, академиялық бедел, халықаралық әріптестік, білім беру ортасын цифрландыру және жаһандық рейтингтерде ескерілетін басқа да индикаторлар талқыланды.

Сергей Христолюбов атап өтті:
«Рейтингтерге қатысу — бұл бір реттік науқан немесе формальдылық емес. Бұл университеттің барлық деңгейін — оқытушылардан бастап әкімшілік сарапшыларға дейін қамтитын жүйелі жұмыс».

Кездесуде reporter мәртебесінің жаһандық академиялық кеңістікке интеграцияның маңызды кезеңі ретіндегі рөліне ерекше назар аударылды.

«Рейтингтер — жай сандар ғана емес. Оның артында университеттің стратегиясы, ашықтығы, беделі, түлектердің сапалы дайындығы мен ғылыми үлесі жатыр», — деді спикер.

AIU үшін жас әрі қарқынды дамып келе жатқан университет ретінде халықаралық рейтингтерге қатысуға өтінім беру – институционалдық дамудың маңызды қадамы. Бұл үдеріс университеттің академиялық беделін арттыруға, тұрақты даму қағидаттарын енгізуге және халықаралық ынтымақтастықты белсенді дамытуға деген ұмтылысын көрсетеді.

Кездесу соңында тараптар ынтымақтастықты кеңейту, алдағы QS іс-шараларына қатысу және AIU-дың халықаралық академиялық беделін нығайту жөніндегі келесі қадамдарды талқылады.

2025 жылғы 12 мамыр күні Астана қаласы әкімдігінің "№101 орта мектеп" КММ базасында «Жаратылыстану мен математикалық ғылымдар саласындағы жасанды интеллект: инновациялар және келешек мүмкіндіктері» атты халықаралық ғылыми-практикалық конференция өтті.

Семинардың басты мақсаты – жаратылыстану және математика ғылымдарының түрлі салаларында жасанды интеллект технологияларын қолданудың заманауи тәсілдерін талқылау, ғылыми қауымдастық, жас ғалымдар мен практик-мамандар арасында тәжірибе алмасу, ынтымақтастықты нығайту және жаңа ғылыми жобаларға жол ашу.

Іс-шараға Ресей, Өзбекстан, сондай-ақ Алматы қаласы, Ақмола, Қарағанды, Қостанай, Маңғыстау облыстары мен Семей қаласы және елорданың мектептерінен математика, физика, информатика пәндерінің мұғалімдері қатысты.

Астана халықаралық университетінің атынан конференцияда екі баяндама ұсынылды:

🔹 «Математика мұғалімдерін даярлауда жасанды интеллектіні қолдану әдістемесі» тақырыбында – Анияров Альмир Асқарович, физика-математика ғылымдарының кандидаты, қауымдастырылған профессор;

🔹 «Artificial intelligence in quantum mechanics» тақырыбында – Нуркенов Серик Амангелдинович, PhD, физика-математика ғылымдарының кандидаты, «6В01505 – Физика» білім беру бағдарламасының жетекшісі, қауымдастырылған профессор.

AIU оқытушыларының баяндамалары жасанды интеллектті білім беру мен ғылым саласына интеграциялаудағы жаңа мүмкіндіктерді ашып, қатысушылардың ерекше қызығушылығын тудырды.

Астана халықаралық университеті атынан конференцияға қатысқан әріптестерімізге ғылыми белсенділіктері үшін алғыс білдіреміз!

2025 жылғы 25 сәуір күні КеАҚ «Х.Досмұхамедов атындағы Атырау университеті» ұйымдастырған «В011 - Информатика мұғалімдерін даярлау» білім беру бағдарламалары тобы бойынша Қазақстан Республикасы Жоғары оқу орындарының студенттері арасында өткен республикалық пәндік олимпиадаға Астана халықаралық университетінің студенттері қатысты.

Университет атынан Информатика-21А тобының студенті Дарьябаев Жақсылық Қонысбайұлы және Информатика-24А тобының студенті Қадыржан Эльдар Нысанұлы өз білімдерін сынап қайтты. Команданың жетекшісі — Педагогикалық институттың аға оқытушысы, магистр Жамалова Самал Арыновна.

Астана халықаралық университетінің командасы пәндік білім мен кәсіби дайындығы үшін ұйымдастырушылар тарапынан Алғыс хатпен және Сертификатпен марапатталды.

Университетіміздің студенттерін және жетекшісін құттықтаймыз! Республикалық деңгейдегі білім бәйгесінде белсенділік танытып, AIU атын биікке көтергендеріңіз үшін алғысымыз шексіз!