Астана халықаралық университеті мен Варшава университетінің бірлескен зерттеуі халықаралық ғылыми журналда жарияланды

Springer Nature баспасының Environmental Monitoring and Assessment журналында «Тарбағатай» ұлттық паркіндегі Ледебур бадамының (Prunus ledebouriana) таралуына арналған халықаралық зерттеу нәтижелері жарияланды. Ғылыми жұмысқа Астана халықаралық университетінің «NatureLaB» ғылыми-зерттеу зертханасы мен Варшава университетінің биология факультеті қатысты.

Жарияланым – Қазақстанның биоалуантүрлілігін зерттеу саласындағы екі университеттің ғылыми ынтымақтастығының нәтижесі. Ғылыми жұмысқа Тоттори университеті мен Польша, Жапония және Израильдің ғылыми ұйымдарының өкілдері қатысқан еді. Бұл халықаралық зерттеу өсімдіктер экологиясы мен геоақпараттық технологиялар бағытын біріктірді.

Зерттеушілер ұшқышсыз ұшу аппараты арқылы алынған кескіндерді және Pléiades Neo спутнигінің суреттерін пайдаланды. Далалық деректер негізінде бірөлшемді конволюциялық нейрондық желі моделін оқытуға және тексеруге арналған материалдар дайындалды. Талдауға кескіндердің спектрлік қасиеті мен текстурасын, сондай-ақ жер бедері мен климат ерекшелігін сипаттайтын 18 көрсеткіш енді.

Картографиялаудың жалпы дәлдігі шамамен 80 пайызды құрады. Модельдеу нәтижесіне сәйкес, Ледебур бадамының бұталары зерттелген аумақтың шамамен 7,5 пайызын алып жатыр. Анықталған аймақтың 70 пайызға жуығы теңіз деңгейінен 700–1200 метр биіктікте орналасқан. Сонымен қатар өсімдік түрінің таралуы мен беткейлердің көлбеулігі және экспозициясы арасындағы байланыс анықталды.

Зерттеудің практикалық маңызы – алынған карталарды өсімдіктің мекендеу ортасына мониторинг жүргізу, бақылау аймағын таңдау және түрді сақтау жұмыстарына пайдалану мүмкіндігі. Бұл тәсілді таулы аймақтардағы басқа өсімдіктерді зерттеу кезінде қолдануға болады.

Бірлескен жарияланым – Астана халықаралық университеті мен Варшава университеті арасындағы ғылыми байланыстың нығаюына, Қазақстанның өсімдіктер алуантүрлілігін сақтау және экологиялық мониторинг жүргізу салаларының дамуына үлкен үлес.

Астана халықаралық университеті мен Варшава университетінің бірлескен зерттеуі – биоалуантүрлілікті сақтау саласындағы маңызды жұмыс.  Ал мұндай іске «NatureLaB» зертханасы мамандарының атсалысуы тәжірибе алмасуға және Қазақстан аумағындағы өсімдіктерді зерттеуге заманауи цифрлық құралдарды қолдануға мүмкіндік берді.