Астана халықаралық университетінде «Қазақ тілінің жаңа формуласы» тақырыбында қонақ дәрісі өтті

2026 жылғы 22 қазанда Астана халықаралық университетінде студенттердің мемлекеттік тілді үйренуге қызығушылығын арттыруға бағытталған «Қазақ тілінің жаңа формуласы» тақырыбында қонақ дәрісі өтті.

Іс-шараны Педагогикалық институттың қазақ, орыс тілдері және тарих кафедрасының аға оқытушысы, филология ғылымдарының кандидаты Гүлнар Нығметқызы Зайсанбаева ұйымдастырды.

Кездесудің құрметті қонақтары белгілі қазақстандық полиглот, лингвист Владислав Тен және психолог, шахмат жаттықтырушысы Николай Маевский болды.

Дәріс интерактивті сұхбат форматында өтіп, қатысушылар қазақ тілін үйренудің өзекті мәселелерін, шет тілдерін меңгерудің ерекшеліктерін, сондай-ақ білім беру үдерісіндегі мотивация мен ойлаудың рөлін талқылады.

Тіл үйренуге деген қызығушылықты дамытуға және жаңа білімді меңгерудің тиімді тәсілдерін іздеуге ерекше назар аударылды. Студенттер талқылауға белсенді қатысып, шақырылған қонақтарға өздерін қызықтырған сұрақтарды қойып, пікір алмасты.

Владислав Тен мен Николай Маевскийге қонақ дәрісіне қатысып, мазмұнды сұхбат жүргізгені үшін, сондай-ақ іс-шараны ұйымдастырушы Гүлнар Нығметқызына білім беруге қосқан үлесі үшін алғыс білдіреміз!