Астана халықаралық университетінде «әл-Фараби мен Конфуций: Ұлы ойшылдар сұхбаты» мүсіндік композициясының салтанатты ашылуы өтті

Бүгін Астана халықаралық университетінде Қазақстан мен Қытай арасындағы рухани және мәдени сабақтастық пен білім беру саласындағы ынтымақтастықты нығайтуға бағытталған «әл-Фараби мен Конфуций: Ұлы ойшылдар сұхбаты» мүсіндік композициясының салтанатты ашылу рәсімі өтті. Бұл туынды Қазақстан Республикасының Президенті Қасым-Жомарт Кемелұлы Тоқаевтың Астана халықаралық университеті базасындағы  Бейжің Тіл және Мәдениет университетінің (BLCU) филиалына арнайы тартуы.

Мүсіндік композиция – екі елдің Шығыс ойшылдарының мұрасына деген ерекше құрметінің көрінісі. Өнер туындысының авторы – әлемге танымал қытайлық мүсінші, Қытайдың Ұлттық көркемөнер мұражайының директоры У Вэйшань. 

Мүсіндік композицияны салтанатты түрде ҚР Ғылым және жоғары білім министрі Саясат Нұрбек мырза және ҚХР-дың ҚР-дағы Елшісі Хань Чуньлинь мырза ашты.

Сонымен қатар рәсімге BLCU вице-президенті, профессор Чжан Баоцзюнь, Бүкілқытайлық қалалық мүсіншілер қауымдастығы төрағасының кеңесшісі, мүсін авторы У Вэйшаньның өкілі Сунь Янь, Қазақстан Республикасы Ғылым және жоғары білім министрлігінің қоғамдық кеңесінің төрағасы Бейбіт Мамраев, «Халық» қорының өкілдері, AIU мен BLCU филиалының басшылығы, профессор-оқытушылар құрамы мен студенттері қатысты.

Кейін қонақтар суретші Қазақбай Әжібекұлының Алаш қозғалысы қайраткерлеріне арналған жеке көрмесін тамашалап, Шығыс мұражайын аралады. Мұндағы ұлттық жәдігерлеріміз шетелдік қонақтарға ерекше әсер қалдырды.

Қонақтар суретші Қазақбай Әжібекұлының Алаш қозғалысының қайраткерлеріне арналған жеке көрмесімен және Шығыс мұражайының экспозициясымен танысты. Біздің заманымыздың VII ғасырынан бастап Қазақстан мен Қытай арасындағы көпғасырлық сауда және мәдени байланыстарды, соның ішінде Тан әулеті дәуірінің құнды нумизматикалық артефактілерін көрсететін бірегей жәдігерлер ерекше әсер қалдырды.

Салтанатты шараның құрметті қонағы ҚР Ғылым және жоғары білім министрі Саясат Нұрбек мырза: «Конфуций мен әл-Фараби. Біз бұл ойшылдармен бір заманда өмір сүрмесек те, бізді біріктіретін дүниелер өте көп. Мұның дәлелі – білімге, даналық пен адамгершілікке ұмтылуымыз. Көпұлтты қоғамда әртүрлі әлеуметтік топтар өмір сүрсе де, біз ғасырлар бойы бір мүддеге жетуге ұмтылдық. Алдағы уақытта теңдесі жоқ академиялық тәжірибесі бар серіктесіміз Қытай елінен көп нәрсе үйренеміз деген үміттемін. Мүмкіндігінше тереңірек оқыңыздар, барынша тәжірибе алмасыңыздар», - деп екі халықтың терең рухани байланысы мен ағартушылық жолына тоқталып, жастарға білімнің маңызды екенін атап өтті.

ҚХР-дың ҚР-дағы Төтенше және Өкілетті Елшісі Хань Чуньлинь мырза: «Білімге және адамгершілік құндылықтарға деген осы ортақ ұмтылыс Конфуций мен әл-Фарабиге уақыт пен кеңістік шекараларын еңсеріп, Қытай мен Қазақстан арасында рухани көпір орнатуға мүмкіндік берді», - деп ілтипатын білдірді.

Бейжің тіл және мәдениет университетінің вице-президенті, профессор Чжан Баоцзюнь Шығыс даналары мұрасының маңызын ерекше атап өтті: «әл-Фараби – мұрасы қазақ жерінің рухани қазынасына айналған ұлы ойшыл, ал Конфуций – қытай философиялық дәстүрінің негізін қалаушы және Қытайдың рухани мәдениетінің символы. Қазір олардың мүсіндерінің қатар тұруы даналардың сұхбатын ғана емес, сонымен қатар Қазақстан мен Қытай өркениетінің терең рухани үндестігін де бейнелейді».

Салтанатты іс-шараның ұйымдастырушысы, Астана халықаралық университетінің президенті Серік Азтаевич Ирсалиев келген қонақтарға өз алғысын білдіріп, Ғылым және жоғары білім министрі Саясат Нұрбек мырза мен ҚХР-дың ҚР-дағы Төтенше және Өкілетті Елшісі Хань Чуньлинь мырзаға қолдаулары үшін ризашылығын жеткізді. Қазақстан Республикасының Президенті Қасым-Жомарт Кемелұлы Тоқаевтың сыйлығы университет тарихындағы ең үлкен марапат екенін атап өтті.