Астана Халықаралық университеті мен QAZBOT Technologies өзара ынтымақтастық туралы меморандумға қол қойды

Бүгін Елордада өткен «QAZBOT Robotics Forum 2026» халықаралық форумы аясында Астана Халықаралық университеті мен QAZBOT Technologies компаниясы арасында өзара ынтымақтастық туралы келісімге қол қойылды.

Меморандум Астана Халықаралық университеті мен QAZBOT Technologies компаниясының жасанды интеллект, робототехника және заманауи цифрлық технологиялар салаларындағы серіктестігін дамытуға бағытталған. Сонымен қатар бірлескен жобаларды іске асыру, тәжірибе және білім алмасу, инновациялық технологияларды білім беру үдерісіне енгізу сынды міндеттерді қамтиды. Бұл келешекте еліміздегі білікті кадрлардың санын арттыруға септігін тигізеді.

Келісімшартқа қол қою рәсіміне Астана Халықаралық университетінің Президенті Серік Ирсалиев пен QAZBOT компаниясының бас директоры Владислав Сафаров және компанияның техникалық директоры Азамат Ешмұхаметов, сондай-ақ ЖИ мен робототехниканы дамыту саласындағы көшбасшы саналатын қытайлық AgiBot компаниясы өкілдері қатысты.

       Еліміздегі цифрлық технологияларды дамытудың бір бөлігі саналатын бұл бастама болашақта ауқымды жобалардың берік іргетасы болмақ. Өйткені ЖИ мен робототехника алға озған заманда, озық технологияларды басқаратын білікті мамандарға да сұраныс артуда. Қос тараптың өкілдері осы мәселені назарға алып, алдағы уақытта өзге де пайдалы жобаларды бірлесе жүзеге асыруға уағдаласты.

        Келешекте бұл кездесу стратегиялық серіктестікті нығайтып қана қоймай, еліміздің цифрлық экожүйесін өркендетуге өз үлесін қосады деген сенімдеміз.