Астана Халықаралық университеті Югра мемлекеттік университетімен ынтымақтастық туралы келісімге қол қойды

Шілденің 3-і күні Астана Халықаралық университетіне Ресей Федерациясының Ханты-Мансийск қаласында орналасқан Югра мемлекеттік университетінің делегациясы келді. Шетелдік оқу орнының ресми өкілдерінің қатарында университет ректоры және биология ғылымдарының кандидаты Роман Кучин, Жоғары экология мектебінің жетекшісі Татьяна Антофеева болды.

Сапар барысында қонақтар университеттің материалдық-техникалық базасымен танысып, ғылыми зертханалар мен мамандандырылған оқу аудиторияларын аралады. Бұдан кейін Астана Халықаралық университетінің басшылығымен ресми кездесу өтті. Жиын барысында тараптар білім беру және ғылым саласындағы ынтымақтастықты дамыту, студенттер мен оқытушылардың академиялық ұтқырлығын кеңейту, бірлескен ғылыми жобаларды жүзеге асыру жайлы сөз қозғады. Сондай-ақ қос дипломды білім беру бағдарламаларын әзірлеу мәселелерін талқылады.

Сапардың ең маңызды жаңалығы – Астана Халықаралық университеті мен Югра мемлекеттік университеті арасындағы ынтымақтастық туралы келісімге қол қою. Бұл құжат екі елдің жоғары оқу орындарының серіктестігін жаңа деңгейге көтеруге бағытталған. Осы арқылы ғылыми-зерттеу жұмыстарын бірлесіп жүргізу, академиялық алмасу бағдарламаларын іске асыру, халықаралық ынтымақтастықты нығайту және білім беру саласындағы өзара тәжірибе алмасуды дамыту көзделіп отыр.

Ресми кездесудің соңында екі университеттің өкілдері өзара естелік сыйлықтар алмасып, жаңа келісімнің жарқын бастамаларға жол ашатынына сенім білдірді.