Дипломатиялық бағыт: AIU-дың Ұлыбританиямен ынтымақтастық жөніндегі бастамалары ҚР Елшілігінің қолдауына ие болды

Ұлыбританияға іссапар аясында Astana International University (AIU) Президенті С.А. Ирсалиев Қазақстан Республикасының Ұлыбритания және Солтүстік Ирландия Құрама Корольдігіндегі Төтенше және Өкілетті Елшісі Әлібек Әсетұлы Бақаевпен кездесті.

Кездесу барысында Елшіге AIU-дың жоғары білім беру саласындағы халықаралық ынтымақтастықты дамытуға бағытталған негізгі жобалары таныстырылды. Сонымен қатар Ұлыбританиямен білім беру саласындағы серіктестікті кеңейтуге бағытталған бірқатар бастамалар ұсынылды. Жаһандық білім беру холдингі INTO-мен серіктестікті дамыту перспективаларына, сондай-ақ инновациялық «жаһандық мультикампус» құру жөніндегі ауқымды бастамаға ерекше назар аударылды.

Өз кезегінде Елші Ә.Ә. Бақаев жоғары білім беру саласындағы ынтымақтастықты нығайту дипломатиялық миссия қызметінің басым бағыттарының бірі екенін атап өтіп, AIU тарапынан ұсынылған жобаларды іске асыруға жан-жақты қолдау көрсетуге дайын екенін айтты.

AIU бастамаларын жоғары деңгейде қолдау университеттің Ұлыбритания жоғары оқу орындарымен ынтымақтастығын одан әрі дамытуға мүмкіндік береді.