Astana International University және Д. Серікбаев атындағы Шығыс Қазақстан техникалық университеті арасындағы серіктестік жаңа ғылыми-техникалық мүмкіндіктерге жол ашады

Astana International University, Д. Серікбаев атындағы Шығыс Қазақстан техникалық университеті және «SpaceLab» компаниясы ғылым мен технология саласында ынтымақтастық туралы Меморандумға қол қойды.

Кездесу барысында тараптар «SpaceLab» ғарыштық бағдарламасы мен IoVIT жобасының болашағын кеңінен талқылады. AIU бұл бастама аясында ШҚТУ-мен бірлесіп, университеттің алғашқы пикоспутнигін ғарышқа шығару мүмкіндігін қарастыруда. Бұл қадам қазақстандық ғарыштық технологияларды дамытуға серпін беріп, елдің ғылыми-техникалық әлеуетін арттыруға және ғарыш саласындағы бәсекеге қабілеттілігін нығайтуға бағытталған.

Меморандум аясында төмендегі бағыттарда нақты келісімдер жасалды. Атап айтсақ,

•          спутниктік технологияларды (KazSat, SpaceLab және т.б.) ұлттық мониторинг инфрақұрылымына интеграциялау;
•    сенсорлық жабдықты орнатумен және жасанды интеллект модельдерін тестілеумен пилоттық аймақтарды құру;
•   студенттер мен жас ғалымдарды ғылыми-зерттеу жобаларына тарту, тағылымдамалар мен бірлескен зертханалар ашу.

Бұл серіктестік университеттерге тек жаңа ғылыми-техникалық мүмкіндіктер ашып қана қоймай, сонымен бірге қазақстандық жастарды жаһандық деңгейдегі ғылыми ізденістерге баулуға, білім мен өндірісті ұштастыруға мүмкіндік береді.