AIU мен Nordic International University арасында ынтымақтастық туралы меморандумға қол қойылды

Астана халықаралық университетінің ректоры Анар Мырзағалиеваның басшылығымен AIU делегациясы Ташкентке барды. Іссапар аясында делегация Nordic International University ректоры Шерзод Мустафакуловпен кездесті.

Тараптар кездесу барысында білім, ғылым және инновация саласындағы маңызды мәселелерді талқылап, оқытушылар мен студенттер үшін жаңа мүмкіндіктерді қарастырды. Сондай-ақ университеттер арасындағы серіктестікті дамыту, бірлескен ғылыми бастамалар мен академиялық ұтқырлық бағдарламасын жүзеге асыруға назар аударылды.

Келіссөз қорытындысы бойынша AIU мен Nordic International University арасындағы ынтымақтастық туралы меморандумға қол қойылды. Басты мақсат – біліктілікті арттыру бағдарламалары мен ғылыми тағылымдамаларды, кәсіби тәжірибе алмасу және бірлескен семинарлар мен конференциялар өткізуді қолға алу. Бұдан бөлек ортақ білім беру бағдарламалары мен ғылыми жобаларды іске асыру.

Серіктестіктің басты артықшылығы – бакалавриат, магистратура және PhD деңгейлеріндегі академиялық ұтқырлық бағдарламасы. Тараптар алдағы уақытта оқытушылар мен зерттеушілерге арналған тағылымдамадан өту, ғылыми кеңес беру және тәжірибе алмасу мүмкіндіктерін кеңейтуді жоспарлап отыр.

Жаңа ынтымақтастық бірнеше бағытты қамтиды. Атап айтсақ, экономика және қаржы, бизнес-менеджмент, юриспруденция, тарих, психология, қолданбалы математика, ақпараттық технологиялар, компьютерлік инженерия, ағылшын филологиясы, туризм және қонақүй бизнесі салалары бойынша академиялық мүмкіндіктер кеңейді.

Сонымен қатар қос тарап бірлескен ғылыми зерттеулер жүргізу, академиялық жарияланымдар дайындау, халықаралық гранттық бағдарламаларға қатысу, пәнаралық жобаларды іске асыру және зерттеу нәтижелерін тәжірибеге енгізу сынды бастамаларды талқылады.

Фотосуреттер Nordic International University сайтынан алынды: https://nordicuniversity.org/ru/press-service/news/markaziy-osiyo-talim-makonida-hamkorlik-nordik-va-ostona-xalqaro-universitetlari-imkoniyatlari-birlashmoqda