Германияның Төтенше және Өкілетті Елшісі Astana International University-ге келді

Astana International University (AIU) Федеративтік Германия Республикасының Қазақстан Республикасындағы Төтенше және Өкілетті Елшісі Моника Иверсен ханымды құрметпен қарсы алды.
Бұл сапар ресми кездесу ғана емес, сонымен қатар өзара түсіністік пен жаңа жетістіктерге ұмтылыспен толығатын ерекше диалогқа айналды. Елші ханым университеттің білім беру бағдарламаларымен, стратегиялық бастамаларымен танысты. Ғылым мен жоғары білім саласындағы бірлескен мүмкіндіктерді талқылау және Қазақстан мен Германия арасындағы ынтымақтастықты нығайту перспективалары ерекше шабыттандырды.

Моника Иверсен халықаралық серіктестікті дамытудың маңыздылығын атап өтіп, студенттер үшін жаңа мүмкіндіктер жасау керектігін ерекше айтты. Ол мұндай ынтымақтастық тек жаңа білімге жол ашып қана қоймай, халықтар арасындағы достық көпірлерін орнататынын жеткізді.

«Біз AIU-мен серіктестіктің үлкен әлеуетін көріп отырмыз және университеттің халықаралық аренада маңызды білім беру және ғылыми орталыққа айналу мақсатын қолдауға қуаныштымыз», — деді Иверсен ханым.

Мұндай сапарлар студенттердің халықаралық көзқарасын қалыптастыруға, олардың мансаптық мүмкіндіктерін кеңейтуге және елдер арасындағы мәдени байланыстарды нығайтуға ықпал етеді.

Astana International University Моника Иверсен ханымға сапары мен конструктивті талқылауы үшін алғысын білдіреді. Бұл кездесу, сөзсіз, жаңа білім беру және ғылыми жобаларды жүзеге асырудың негізі болмақ.