AIU мен София университетінің магистрлік қос дипломды білім беру бағдарламасына құжаттар қабылдануда

Астана Халықаралық университеті мен Әулие Климент Охридски атындағы София университеті «Eco-Management» магистрлік қос дипломды білім беру бағдарламасын ұсынады. Бұл бағдарлама студенттерге екі университеттің дипломын алуға мүмкіндік береді. Сонымен қатар, олар халықаралық академиялық ортада тәжірибе жинақтап, ғылыми-зерттеу жұмыстарына қатысып, екі университеттің білікті оқытушыларынан білім алады.

«Eco-Management» магистрлік қос дипломды білім беру бағдарламасы қоршаған ортаны басқару, жасыл технологиялар мен экологиялық саясат салаларындағы кәсіби құзыреттерді дамытуға жол ашады. Бұл – мемлекеттік деңгейдегі қоршаған ортаны қорғау шараларын басқаруға, табиғи ресурстарды тиімді пайдалануға және экологиялық қауіпсіздікті сақтауға бағытталған заманауи әрі сұранысқа ие сала.

Білім беру бағдарламасы екі негізгі бағытты қамтиды: «Ботаникалық бақтар және агроэкожүйелер» және «Экологиялық саясат және қоршаған ортаны басқару». Осы арқылы «Eco-Management» магистрлік қос дипломды білім беру бағдарламасы экология және тұрақты даму саласында заманауи білім алып, халықаралық академиялық ортада кәсіби әлеуетін арттырғысы келетін мамандарға жаңа мүмкіндіктер ұсынады.

Қазір Астана Халықаралық университеті мен Әулие Климент Охридски атындағы София университеті арасындағы академиялық байланыс нығайып келеді. Бұл болашақта Қазақстан мен Болгария арасындағы қоршаған ортаны қорғауға бағытталған бастамалардың артуына септігін тигізеді. Әулие Климент Охридски атындағы София университеті – Болгариядағы ең көне жоғары оқу орындарының бірі. 1888 жылы негізі қаланған университет әлемнің 200-ден астам ғылыми ұйымымен халықаралық ынтымақтастық орнатқан. 

Қазіргі уақытта «Eco-Management» магистрлік қос дипломды білім беру бағдарламасына құжаттар қабылдануда. Толығырақ мәліметті +7 777 204 05 55 телефон нөміріне хабарласып біле аласыз.